Pinsala sa Tubattaha

PINSALA SA TUBBATAHA

Batay sa ulat ng Task Force Tubbataha, 1,000 square meters ang lawak ng nasirang corals saTubbataha Reef. Sanhi ito ng pagsadsad ng USS Guardian, isang minesweeper na pag-aari ng gobyerno ng Estados Unidos.


Ipinagutos kaagad ng task force, na binubuo ng mga kinatawan ng gobyerno ng United States, US Navy, Philippine Navy at Philippine Coast Guard, ang pagtanggal muna sa langis ng barko para maiwasan ang pagtagas at mas lalong maglagay sa peligro ang UNESCO world heritage site. Ang nasabing lugar ang breeding ground ng mga isda sa karagatan ng Palawan at dahil sa lawak ng nasira, mahabang panahon ang kailangan bago ito maibalik sa dati.

Sa kasalukuyan, pinal na ang preparasyon ng task force para matanggal ang minesweeper sa Tubbataha sa Sulu Sea. Gayunpaman, malaki na ang pinsala nagawa hindi lang sa ating coral reef kundi hanapbuhay nang napakaraming mangingisda na umaasa sa mga isdang nabubuhay sa mga corals ng Tubattaha Reef.

Sa aking palagay, kailangan papanagutin ang pamahalaan ng Amerika sa pinsalang naidulot nila. Kahit pa hindi nila sinasadya ang pagkasira ng minesweeper sa ating karagatan, wala pa rin silang karapatang pumasok sa Tubattaha Reef dahil ito ay isang “protected site”. Kailangan ipakita ng ating bansa na handa nating ipagtanggol ang ating mga pag aari para pag ukulan tayo ng pagpapahalaga ng iba.

Filipino Activity

Binigyan tayo ng Diyos ng bibig para makapagsalita at utak para makapag-isip.

                    Lahat ng ibinigay at inilikha ng Diyos ay maituturing na biyaya. Maging ang pamilya man o mga kaibigan natin ito, ang kakayang gumising bawat umaga at pumasok sa paaralan, ang kinakain natin araw-araw, ang suot nating mga damit, at marami pang iba – lahat ito regalo niya sa atin. Ang paggamit ng regalong ibinigay sa atin ang pinakamagandang paraan para maipakita ang pagpapahalaga natin dito.

                    Dalawa sa mga regalong ipinagkaloob sa atin na maaaring madalas natin binabalewala ay ang ating bibig at ang utak. Ito ang mga regalong tayo lamang ang makakagamit at hindi kailanma’y pwedeng kunin ng iba sa atin. Ang bibig ay hindi lang ginagamit para ngumuya ng pagkain. Ang utak ay hindi lamang andiyan para maging tama ang andar ng katawan. Ginagamit ang bibig para makapagsalita at utak para makapag-isip.

                    Hindi naipaghihiwalay ang paggamit ng utak sa pag-iisip at bibig sa pagsasalita. Walang saysay magsalita nang hindi pinag-iisipan kung ano ang sasabihin, at wala ring saysay ang utak na nag-iisip kung hindi bibigkasin ang mga ideya at pananaw ng nag-iisip. Ang bibig ay isang instrumentong walang kinikilalang hangganan sa mensahe at ideyang nais iparating ng nagsasalita. Kapag ginamit ito sa masamang paraan, maaari itong makasira at makabigo ng tao sa katotohanan o kasinungalingang nilalaman ng mga sinasabi. Ngunit kapag ginamit naman ito sa wasto at mabuting paraan, marami itong sugat na kayang gamutin – maraming tao na pwedeng pasayahin at maraming mali ang maiwawasto.

                    Walang hangganan ang utak ng tao sa lalim at lawak nang puwede nitong isipin. Napakaraming problema ang nabigyan ng solusyon dahil sa paggamit ng utak sa pag-iisip – gamot sa sakit, sagot sa mga pagsusulit, solusyon sa trapiko, at marami pang iba. Ngunit, nawawalan ng saysay ang pag-iisip, kung hinid naman naipahayag at naibigkas ang mga palaisipan at napag-isipan. 

                    Dahil dito, ang bibig at utak ay dalawang regalo sa atin na kailangang gamitin ng sabay para magkaroon ito ng saysay. Kung isa lang sa alinman sa dalawa ang ginamit, palaging bitin at may kulang, at para bang nawalan na rin ng bias ang dalawa. Maraming tao at buhay ang mababago at mapapasaya sa paggamit pareho ng bibig at utak.